„Norichten ut en analoge Welt“   

“As wi to`n surfen noch an de See fohrt sind”

Dat weer een Book vun Boris Hänssler un een Inspiratschoon för mi, dor wieder to denken, wo düsse Schrieversman ophört hett. Bi´t trüchkieken op de Tied vör dat Internet, löppt een je Gefohr in Nostalgie to versuupen. Fröher weer nich allens better, man technologisch sehn, weern de 80er een Tied wo jedet enkelte Kilobyte för sik noch tellte. Dat geev elektroonsche Mailkassens un Akustikkoppler, dat Nett weer jüst dorbi sik optobuun. Dat Nett harr so grote Löcker, dat een sik goot versteeken kunn. So neem Autor Boris Hänssler den Leser mit op een nostalgische Reis in en Tied, as man noch ahn Navi autofohrn dee, Mixtapes opnehm un de Öllern daagelang nich wussen wo ehre Kinner jüst weern. Wenn de sik op ehrn Interrail-Trip jichtenswo in Europa twüschen Paris un Palermo ut´e Telefonzell vun een Wählschieven-Telefon ut mellen deen, weer alles goot. 

Hüüt susen de Teenager jümmers noch dörch Europa. Man, dat eegentli Aventüür, oder dat „Terra inkognita“ fangt al vör de Huusdöör an, wenn de GPS- Chip in´t Smartphone de Geist opgeven deit, Dochter un Söhn för „Helikopter-“ un anner Öllern nich´mehr to orten sünd.

Düsse Bidrag schall een Oprop ween. Een Oprop to´n digitalen Ungehorsam. Riet di de Afhöörmikrofone vun´t Lief as Will Smith in Staatsfeind Nummer 1. Gah eenfach mal nich an´t Telephon wenn dat pingelt oder noch better, versett dien Plietschfon in Fleeger-Modus för immer. Mehr as 25 Millionen Düütsche (Stern Online 1.September 2013)  sünd krank, se denkt dat dat Smartphone pingelt oder vibreert offschonst dat Deel sik nich röögt. „Phantom-Klingeln“ nöömt een dat. Hallo, Mc Fly, is da jemand zuhause ?

Douglas Adams „Hitchhiker through the Universe“ kunn ahn Handdook nich op de Reis gahn. Marty Mc Fly un Doc Brown brukten den Flux-Kompensator üm in de Tied jumpen to köön. Wi bruuk philosophische Influencers wat uns Warktüüg an de Kopp schmieten doot, de uns dorbi helpt to begriepen wat mit uns vundaag passeert, de uns anstött den Dreih ruut to finnen, uns anstött ut de Reeg to danzen, utobreken ut´n „Silikon-Valley“-Algorithmus wat uns Alldag to programmeern versöökt.