Nettwark

Wokeen Bescheed weeten will, wat los is in de plattdüütsche Welt, de kummt an Volker Holm nich vörbi. Ik freu mi jümmers, wenn ik niege Infos över’t PLATTNET in de Post heff. Mellt di eenfach an un du kriggst allens automatisch as Nettbreef tostüürt.

Ik fang mal an, en paar wietere wichtige plattdüütsche Knütten in de Reeg to kriegen. Baven ganz in‘ Norden vun SH, dor in Nordfreesland bün ik boorn un ganz in de Neegde vun mien Heimatdörp Ockholm liggt Leck. Bi de een oder annere pingelt dat denn villicht al? Dor is dat Zentrum för Nedderdüütsch för den Landesdeel Sleswig to finnen. Gesa Retzlaff hett dor dat Leit un se is blangenbi nich blots een wunnerbor kompetente Plattexpertin wat för de Saak brennt, sünnern ok noch Vörsittersche vun den Nedderdüütschen Bühnenbund.

Dat plattdüütsche Theoter is een astreine Plattmaschien. Kennst to Anfang villicht blots een paar Wöör, övernimmst denn dien erste lütte Rull, wasst rin un miteenmal snackst du Platt. Wenn wi all mal dor baven in Norden sünd, jüst 100 Johr olt worrn is de Nedderdüütsche Bühn in Flensborg. Rolf Petersen un sien Lüüd hebbt as all Bühnen mit den Virus to kämpfen, man jichenswenn mut dat je weller mit Vörstellen los gahn.Toi. Toi.Toi.

Flensborg is nich blots een Besöök wert un de hillige Graal vör vele Handballspelers sünnern ok Platz vunˋ gediegen Uni. so sünd an de Europauni Perfesser Willy Dierks und Robert Langhanke düchti mit Plattdütsch to gang. Robert Langhanke is sodennig ok noch Vörsitter vun de Klaus Groth Sellschap. Eenmal na de annere, de holsteensche Siet hen, finnen wi dat Pendent to Plattdüütschzentrum in Leck, in Mölln. Dor hett Thorsten Börnsen dat Leit un is düchtig kreativ in Saken Literatur, Podcast un Plattbeats, den plattdüütsche Bandwettstriet för heel Norddüütschland. 

Kiek wi en beten över de Lannesgrenz röver, liggt dor Hamborg vör de Döör. Besöökt dat Ohnsorg Theoter, wannehr dat geiht, dat lohnt sick. In dat Theoter hett ok Christiane Ehlers vun’t Nedderdüütschsekretariat ehr Büro. Op ehre Internetsiet gifft bannig veel Infos to de EU Sprakencharta un to den Bunnesrat för Nedderdüütsch, wat sick för de Interessen vun de grote plattdüütsche Sprakengemeende insetten deit. Een Highlight in’t Johr is jümmers ok de Plattdüütsche Böökermess vun de Carl-Töpfer Stiften in Hamborg. Dor kummt keen een ahn frischet Book in de Tasch torüch. To’n Bispill mit’n Wark wat de Quickborn Verlag mit Peer-Marten un Gesche Scheller jüst oplegt hett. Gratulation achteran ok vun mi to den Kappelner Literaturpries (2020). 

Mehr kümmt …..