Vullbremsen un wedder Gas geven!

To de Situatschoon vun’t Plattdüütsche Theoter in’t Land: De Vörsittersche vun de Nedderdüütsche Bühnenbund SH, Gesa Retzlaff, hett tosamen faat, wat dat Corona-Johr 2020 för de 16 Mitglieds-Bühnen in’t Land mit mehrere hunnert Hölpers bedüüd hett. As Plattmensch kann ik nix dorto doon, oder weg nehm. Ehr Metaphern finnt en direkte Weg to mien Hart. Dütwegen Bühn frie för Gesa!

„Ik will unse Situatschoon mal mit en Bild beschrieven:Wi sünd in de Nedderdüütsche Bühnenbund en grote Familie över ganz SH verdeelt, de mit en bunte Fuhrpark ünnerwegens is plattdüütsche Theater ünner de Lüüd to bringen. In de letzten Johren hebben wi dormit in’n Snitt umbi 100.000 Tokiekers faatkregen. Vunjohr kamen wi nich mal op 20 Dusend un de weren meist all al in de Januar un Februar bi uns. Um dat Bild wiedertomalen: In unse Runn sünd welke Bühnen mit Sprinters ünnerwegens, annern mit 20-Tunners.

Dat wirkt sik op de Betriebskosten un bi en Vullbremsung, as in de März, natürlich op de Bremsweg un de Ladung ut. Mehrere Bühnen harrn Anfang März al Produkschonen komplett utpackt, stunnen direkt oder bald vör Premieren, de se denn sotoseggen vun de Ladefläche schaten sünd. De meisten Stücken dorvun sünd nu eerstmal wedder inlagert, solang, bet de Rahmenbedingungen dat Ruthalen wedder lohnen. 

Poröse Toversicht

Intwüschen worrn un warrn Speelplaans laufend umschreven un schaven, Stücken mit wenig Spelers inplaant, Stücken mit gröttere Ensembles al mal op de List för 21/22 sett. De Toversicht för de twete Speeltiethälfte is orig wat poröser, de Akteure – un hier sie mal utdrücklich mit gröttste Respekt un Anerkennen betont, dat de sik meist all ehrenamtlich engageren – sünd trüchholener, as noch in’n Harvst to’n Speeltietoptakt. To drucken waagt totiets keen Bühn recht wat, toveel Papeer is al för de Tunn produzeert worrn. 

Besunners weh daan hett un deit unse Bühnen in Lübeck, Flensborg un Kiel, dat se jemehr 100-johrige Jubiläen nich so fiern kunnen oder könen, as wat se sik dat vörnahmen harrn. Aver ok hier gellt, as in manch private Familie ok: Opschaven, nich Ophaven! Itzehoe harr dat Glück, dat se ehr Fierlichkeiten op Ende Oktober leggt harrn un dat kunn denn to jemehr Freud -in’n wohrsten Sinn vun’t Woort – över de Bühne gahn. 

Na Alternativen kieken

Liekers all Hinnern worr un warrt na vörn un na Alternativen keken. Bühnen sünd in’t Internet aktiv mit Vörlesen, mit lütte Filme un de Preetzer hebben vunjohr sogor jemehr Wiehnachtsmärchen statts op de Bühn vör de Filmkamera hatt, dat sik dat jedereen in’t Nett ankieken kann. 

Dor warrt nadacht över Podcasts, Hörspele, Anbotten an de frische Luft in de Summertiet, wi beholen de Theaterdaag in Molfsee op unse Plaan un dor warrt wiss noch dat een oder anner mehr Niege angahn!

Wat wi an’t Enn vun düt Johr faststellen: Dat Opschuven in Happens un denn doch nich to Slags kamen kost wesentlich mehr Knööf, as en Speelbedriev bet to’n Anslag. De entscheden Ünnerscheed maakt, wat torüchkummt: de Reakschoon vun unse Publikum! Velen Dank an düsse Steed an all Lüüd un ok Institutschonen, de jemehr Bühnen in düsse Tiet stütten. Blievt Se dorbi! Unse grote Wünschen för 2021 is, dat wi uns weddersehen un dat wedder wat geiht för jem un uns.“

@dorto gifft dat hier ok noch een Artikel vun mi op NDR Sleswig-Holsteen,