Ik warr faken fragt, woans kann een an besten Plattdüütsch lehrn? Denn segg ik jümmers, fang eenfach an to snacken. Segg „Moin“ un denn kaamt jümmer mehr Vokabeln dorto. Nee, ganz so eenfach is dat natürli ok wedder nich. In de Bäckerladen vun mien Öllern op Dörp bün ik automatisch mit Plattdüütsch opwussen, indüükert worrn in de Spraak. För de, wat nich düsse Chance harrn, gifft dat nu tominnst dat Nett as grote Plattdüütschkrink mit vele Links un Bidrääg op platt ton toluustern as bi „Hör mal‘n beten to“ oder op de zentrale Plattsiet vun den NDR, mien Brötchengever. Dor lohnt sik dat ok un kieken genauer hen. Ton Bispill op de Index-Siet vun NDR1 90,3, dor is to jede Podcast-Utgaav ok en korte prägnante Siet mit Billers, de een fein bekieken kann. Wat wi so op den Zeddel hebbt un wat ik meen, een Tokunft vun Plattdüütsch in de Medien ween kunn, heff ik 2019 in een Vördraag tohoop faat, de jem sik hier daaladen köönt.

Wat nu de Grammatik un plattdüütsch schrieven angeiht is de Fehrs-Gill mit’n Sass, dat Grammatik- un Plattdüütschwöörbook ganz wiet vörn. Tominnst för en bestimmte Deel vun’t Plattdüütschland. Een Fundgrube un een Schatz is dat Mammutwark un Wöörbook vun Sprakenwetenschapler Otto Mensing. Dat heele Wark in fief Bände is nu heel un deel Online stellt worrn. Wokeen ton Bispill weten will, wat en Babbelsteen is, finnt dat hier. Weer schöön, wenn dat bi een digitales Wöörbook ok een Söken- Funktion geven worr, man de heff ik noch nich funnen. Mag ween, dat dat ok gar nich vörsehn weer.

Förˋt lehrn vun dat ostfreesche Platt gifft, nix bedderes to‘n Bispill as dat Online Wöörbook vun de Ostfreesche Landschaap. De Diskussion üm de richtige plattdüütsche Schrievwies affhängig vun de Region is ümmer weer Thema un vigeliensch bavento. Dorto mehr an annere Stee. En richtig grote multimediale Bunk an Materialien nich blots för Schölers stellt Karen Nehlsen vun‘t IQSH online. Över de dösige Coronatied sünd dor so vele fantastische un kreative Plattdüütsch-Apps för dat lehrn Tohuus dorbi rutsuurt, dat een gar nich weet, wo een anfangen schall.

Nu to de „Metaebene“. As Plattarbeiter interessiert mi natürli ok, wat över mien Modderspraak forscht un dacht warrt. Dorbi interesseren mi grote Ünnersöken jüst so as enkelte Beobachtungen. Bilütten bün ik op en öllere Blogartikel stött, wo dat üm de Diversität vun de plattdüütsche Spraak geiht, wat ik bannig interessant finnen do. Nich blots wiel hier över Annie Heger un Yared Dibaba snackt warrt, de uns „Hör mal’n beten to“ Autor*innenstamm tohört, sünnern ok wiel hier en Literaturwetenschapler as Prof. Dr Stefan Willer vun buten as Beobachter vun de twete Ordnung fungeert un dat wat he süht mit sien egen Handswarkstüüg bearbeiden deit.

dor kummt noch wat !